Presentación de libro ‘El Padre Revilla’ (Carlos Sánchez Tarrago)

Carlos Sánchez Tárrago – historiador, diplomático e escritor – presentará no Ateneo Casino o seu libro biográfico El Padre Revilla (TAU Editores). 

‘Educar, educar sempre. Eu teño o pensamento de establecer varias escolas Hispania con colonia agrícola anexa. Esa é a mellor forma de entrar en Marrocos. O labor de España en Marrocos debe ser obra dos mestres, dos médicos. Como franciscano sempre, e ante todo amante dos humildes, defensor do explotado.’

Con estas palabras propias resúmese a voz e o ideario de Padre Revilla, o frade aviador que bordeou as esquinas aventureiras dos anos de España en Marrocos.

Axuda a enterrar os corpos insepultos de Monte Arruit sendo capelán da Lexión con Franco. Entrevístase con Abd-o- Krim para liberar prisioneiros tras a batalla de Annual. Tenta levar a cabo, no Rif, o seu proxecto agrícola. En España participa coa Liga Nacional Campesina. Termina Filosofía e Letras e o Doutoramento en Dereito.

Obtén a Cátedra de Historia no Instituto de Trujillo e, por se non fose pouco, preséntase ás eleccións a Deputado polo Partido Republicano Radical Socialista.

Esta é a biografía dun esquecemento, unha historia sen epitafio. É a última fronteira dun home que fixo da amizade un fogar e da entrega aos máis desfavorecidos a súa razón de vivir. E de morrer ante o pelotón de fusilamento.

Unha presentación con especial relevancia neste 2021, cando se cumpren 100 anos do ‘Desastre de Annual’, no que faleceron catro monfortinos. 

O libro, ademais, relata a relación de amizade que tivo o Padre Revilla con Branca, a filla de Emilia Pardo Bazán, e co seu marido, o xeneral Cavalcanti, quen substituíu ao xeneral Silvestre, morto en Annual, á fronte da comandancia xeral de Melilla.

Acceso libre, previa reserva no teléfono 648 435 033